RECHETAS SEFARADIES

 



  • Salata de berendjenas a la bulgara (kiopolu). 
  • Berendjenas fritas kon yogurt. 
  • Fritada de tomat kon prishil (perejil) i pimienta. 
  • Revanada de parida. 
  • Keftes (albondigas) de patata kon karne. 
  • Mogados de almendra (masapan). 
  • Mogados de bimbriyo (membrillo). 

SALATA DE BERENDJENA A LA BULGARA (KIOPOLU) 
Materiales:
1 tomat
2-3 berendjenas medianas
4 pimintones vedres o kolorados godros
4 kucharas de azeyte
1 kuchara de prishil pikado
1 pimintoniko fuerte* o paprika fuerte (segun el gusto)
Preparasion:
Asar las berendjenas en el gril o sovre el gaz de todas las partes, deshar ke se yelen un poko, meter kada una debasho del chorro de la fuente kon la agua fuerte i kitar kon delikateza las kashkas ansi ke las pipitas. Pikarlas muy minudo, adjustar las kuatro kucharas de azeyte, la sal, el prishil, el piminton fuerte i los kuatro pimintones muy bien pikados. Mesklar todo bien i deshar en el frijider* una o dos oras afin ke las vedruras tomen la savor la una de la otra. Antes de servir rayer un tomat i mesklarlo kon la salata. (Si se mete el tomat kuando se apronta la salata, se agrea).




BERENDJENAS FRITAS KON YOGURT 
Materiales (6 - 8 porsiones):
3 berendjenas
4 dientes de ajo
2 vazikos de yogurt
sal
azeyte
Preparasion:
Mundar i kortar la berendjena tajadas de 1 - 1,5 sms. de godrura, meter por enriva sal, deshar eskurrir las tajadas en un tefsin burakado* serka de una ora, enshugarlas kon papel absorbiente. Friyirlas de las dos partes en azeyte muy kaente por unos kuantos minutos, asta ke toman una kolor rosha. Despues friyir por un segondo tres dientes de ajo pikado i esparzirlos sovre las tajadas de berendjena. Meterlo todo, para ke eskurra la azeyte, en un tefsin burakado o sovre un pedaso de papel absorbiente i despues aresentar las tajadas en un plato. Antes de komer mesklar el yogurt kon la sal i el resto del ajo pikado. Se sierve porsiones i por enriva de kada porsion se mete tres kucharas de yogurt kon ajo.

FRITADA DE TOMAT KON PRISHIL I PIMIENTA
Materiales (4 - 6 porsiones):
1 kilo de tomat
4 guevos bateados
2 kucharas de prishil pikado minudo
2 dos revanadas de pan
sal i pimienta a gusto
Preparasion:
Enshaguar el tomat, kitarle el kuero i kortarlo minudo. En un resipiente meter los guevos bateados, el prishil, la sal i pimienta i la miga del pan mojada, esprimida i dizminuzada. Mesklar bien, adjustar el tomat ke fue esprimido un poko para kitarle el kaldo. Kuvrir el fondo de un paylon kon bastante azeyte, kaentar bueno i echar adientro la fritada. Aresentar kon una kuchara para ke este igual de todas las partes. Meter a orno ke fue kaentado de antes a 180° - 210°, i kozer 45 minutos. La fritada esta pronta kuando toma una kolor rosha i sus bodres se despegan del paylon.
 
 

REVANADAS DE PARIDA

Materiales:
10 revanadas de pan blanko fresko
1 litro de leche
2-3 guevos bateados 
sirop o miel 
azeyte para friyir
Preparasion:
En una sarten grande meter a kaentar la azeyte. Asta ke se kaenta la azeyte, meter kada revanada adientro de la leche, ke se ablande un poko, untarla en el guevo i friyirla de las dos partes, asta ke toma kolor de biskuchada. Aresentar las revanadas en una fayancha i sirvirlas kon miel, arope o sirop por enriva.
Deke revanadas de parida? Porke se davan a komer a las rezin paridas para ke les venga fuersa i les abashe leche. Dizian ke estas revanadas davan fuersa i salud a la parida i de aki el nombre.




KEFTES DE PATATA KON KARNE
Materiales (6 porsiones):
7-8 patatas grandes
300 gramos de karne mulida
2 guevos
sal a gusto
arina o migas de pan
azeyte para friyir
Preparasion:
Mundar, lavar i eskaldar las patatas. Kuando estan bien blandas azerlas puree i desharlas yelar un poko. Adjustar la karne i la sal i finyir asta ke se obtiene una meskla omojena.
Kon manos umidas tomar balikas de la grandor de un guevo i entre las dos manos formar las keftes. Untarlas en la arina i el guevo i friyirlas en la azeyte ke ya fue kaentada de antes. Meter las keftes sovre un papel absorbiente para embever la azeyte i servirlas kaentes.

MOGADOS DE ALMENDRA (MASAPAN)

Materiales:
1/2 kilo de almendra sin kashka
2 vazos de asukar pudra
1 guevo bateado
Preparasion:
Buyir agua en una oya, echar adientro las almendras, tapar la oya, amatar la lumbre i desharlas uno poko de tiempo (5-7 minutos) asta ke se puede kitar el kuero de las almendras. Mundarlas, enshaguarlas i meterlas a sekar. Kuando se sekaron, molerlas i pasarlas a un resipiente, mesklarlas kon la asukar i el guevo. Amasar todo bien. Kuando la masa esta pronta, tomar un poko kon las manos ke fueron mojadas kon sumo de limon, dar la forma de un palo de la godror ke se kere i kon un kuchiyo kortar en forma de mogados. Aresentar en una tava* i deshar sekar un dia o dos. Meter los mogados en una bocha serrada, ansi pueden turar mas de un mez. Se pueden guadrar en el frijider tambien.

MOGADOS DE BIMBRIYO
Materiales:
800 gramos de bimbriyos
2 vazos de asukar
2 limones
1½ vazos de agua
Preparasion:
Mundar la kashka de los bimbriyos, kortarlos en kuartos, kitarles las pipitas i el korason, enshaguarlos i kozerlos sin tapar en fuego moderado, en un vazo i medio de agua asta ke se ablandan, mas o menos media ora. Eskurrirlos i desharlos yelar en tefsin burakado, despues azerlos puree en pasandolo por mulino o kon un piron o en el blender. Mezurar la kantidad de puree obtenida, adjustar la mizma kantidad de asukar ansi ke el sumo de un limon para dos vazos de puree de bimbriyo. Meter todo en una kacharola i kozer en fuego moderado. Mesklar de vez en kuando, kuando se esta koziendo, asta ke no keda likido del todo i se obtiene una masa ke se despega fasilmente de la kacharola. Mojar el fondo de un paylon no ondo, kon el sumo de medio limon i aresentar de manera igual la masa de bimbriyo en estando ainda kaente. Meter tino a ke este lizo lizo, en echando por enriva el sumo del ultimo medio limon. Taparlo kon un pedaso de gaza i meterlo al aire unos kuantos dias asta ke se seka bueno bueno. Entonses se kortan mogados. Este dulse se konserva afuera del frijider mas de tres mezes, en el frijider mizmo un anyo.

Glosario de tיrminos:

Fuerte - Pikante (kuando se trata de komida).
Kuchunduria (del grego) – Remolacha.
Kacharola – Cacerola.
Tefsin burakado - Atuendo espesial para eskrurrir i kolar los ingredientes de una komida.
Tevaja – Tovalla.
Gambas - Pimintones kolorados, grandes i pulpudos, uzados prinsipalmente para salatas.
Kashkaval - Kezo amariyo, seko i pikante. Asemeja al parmezan italiano o al manchego espanyol.
Anito - Yerva aromatika, semejante al anis. Se uza en las salatas i en algunas komidas kon vedruras.
Enchusa - Komida a baza de masa, kuvierta kon una meskla de berendjenas i metida al orno.
Haminado - Kocho a fuego basho, durante unas kuantas oras.
Tendjere - (del turko) Resipiente, oya para gizar.
Kefte(s) - Albondiga(s), kopeta(s) de karne o vedruras.
Prasa – Puero.
Bureka - Komo empanada ( ma aprontada al orno i no frita).
Handrajo - Meskla de tomat i sevoya kon el kual se reyenan las burekas.
Gomo - lo ke se mete adientro de las vedruras (o otras komidas) reyenadas.
Soda - Bikarbonato de soda ke se mete en lugar de levadura, en kozas de orno, para ke "levanten".
Chanaka - bol, chiko resipiente ondo.
Susam- Sesamo.
Anason – Anis.
Findjaniko - (del turko) chika tasa de kafe.
Baking Powder - Komo "soda".
Fila - Masa muy delgada, komo ojaldre.
Tava - Resipiente rektangular, ancho i yano, para kozas ke van al orno.

 

 


 

הקמת אתרי אינטרנט באופן עצמאי או על ידי בונה אתרים, מחיר אטרקטיבי. תמיכה

           http://www.yeladudim.co.il/ 


 

הזכויות והאחריות לתכני האתר cooking שייכים ל cooking cooking בלבד
האתר עודכן לאחרונה בתאריך 07/08/2013
עד כה נצפו באתר 52619 עמודים